/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Gwlad Belg yn curo Cymru o drwch blewyn ar noson ddramatig

Llun o Harry Wilson yn cymryd cic o'r smotyn.Getty Images

Harry Wilson sydd wedi sgorio fwyaf dros Gymru o dan Craig Bellamy

Mae Gwlad Belg wedi curo Cymru o 4 – 3 mewn gêm ddramatig a chofiadwy ym Mrwsel nos Lun.

Yn y diwedd fe brofodd sêr mawr Gwlad Belg yn ormod i Gymru gan ddod â rhediad di-guro Craig Bellamy i ben.

Mae Cymru bellach yn yr ail safle yn y grŵp ar gyfer y gemau rhagbrofol ar gyfer Cwpan y Byd 2026.

Dim ond enillwyr y grŵp fydd yn sicrhau eu lle yng Nghwpan y Byd, gyda'r tîm sy'n gorffen yn ail yn cael lle yn y gemau ail gyfle.

Llun o Brennan Johnson yn sgorio gol.Getty Images

Brennan Johnson yn sgorio trydydd gôl Cymru

Fe enillodd Gwlad Belg gic o'r smotyn ychydig ar ôl 10 munud a manteisiodd Lukaku ar y cyfle.

Fe ddaeth ar ôl i ymgais Kevin De Bruyne daro braich Brennan Johnson yn y cwrt cosbi.

Munudau'n ddiweddarach mae Tielemans yn bachu eu hail gyda gôl wych i'r gornel dde uchaf.

Doku sy'n camu ar ei droed chwith i gipio'r trydydd ac o fewn hanner awr a Chymru heb wneud fawr o'i le roedd hi'n 3-0.

Ond, eiliadau cyn hanner amser mae Cymru'n enill cig gosb eu hunain a Harry Wilson yn ei chladdu, 3-1.

Cymru dal ynddi?

Dechreuodd Cymru'r ail hanner yn gryf a thua 50 munud i mewn i'r gêm fe sgoriodd Sorba Thomas gan aildanio'r ornest.

Roedd yna gyfleoedd ar ddwy ochr y cae a'r nesaf i ganfod cefn y rhwyd oedd Brennan Johnson.

3-3 gydag ugain munud yn weddill a chefnogwyr yn dechrau meddwl ai hon fydd y tro cyntaf i Gymru guro Gwlad Belg oddi cartref?

Gyda dwy funud i fynd, fe chwalodd Kevin De Bruyne'r freuddwyd honno gan sgorio gydag ergyd cyntaf o groesiad hyfryd.

Llun o Kevin De Bruyne'n dathluGetty Images

Kevin De Bruyne yn sgorio yn y munudau olaf

Fe wnaeth Bellamy dri newid i'r tîm wnaeth drechu Liechtenstein 3-0 yng Nghaerdydd nos Wener.

Bu rhaid i Neco Williams adael y cae nos Wener yn dilyn anaf i'w goes felly'r amddiffynnwr canol cae Chris Mepham gamodd i'r adwy gyda Ben Davies yn symud i chwarae fel cefnwr chwith.

Fe ddychwelodd Jordan James i ganol cae gyda David Brooks yn ychwanegu at yr ymosodwyr ar ôl i Liam Cullen a Kieffer Moore gael eu henwi ar y fainc.

Llun o dim Gwlad Belg yn dathlu.Getty Images

Mae Cymru yn yr ail safle yn y grŵp ar gyfer y gemau rhagbrofol ar gyfer Cwpan y Byd 2026

Mae Gwlad Belg bellach wedi ennill 42 gêm ragbrofol yn olynol.

Y tro diwethaf i Wlad Belg golli mewn gêm ragbrofol oedd yn ôl yn 2015 ac yn erbyn Cymru oedd honno.

Nos Lun oedd y ddegfed gêm rhwng y ddwy wlad ers 2012.

Y tro diwethaf i Gymru guro Gwlad Belg oedd yn rownd wyth olaf Euro 2016 - efallai'r gêm bwysicaf a mwyaf cofiadwy erioed rhwng y ddwy wlad.

Mae Cymru yn Grŵp J gyda Gogledd Macedonia, Liechtenstein, Kazakhstan a Gwlad Belg.

Mi fydd gêm nesaf Cymru oddi cartref yn erbyn Kazakhstan ar 4 Medi.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [email protected] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig

Straeon perthnasol